Cômmissies en 'afdieëlinge'
Carnavalsvereniging de Maasjoerts telt verschillende cômmissies en 'afdieëlinge', die het bestuur óndersteune mit de ienvulling en uutvoering van dieëltake van de vereniging.
'n Cômmissie bestöt uut mieërdere persoeëne, waorbeej eur take en bevoegdheeje zien vastgesteld dur 't bestuur.
Ieder bestuurslid hèt ôp ieën of andere wiéze 'n directe 'link' nor teminste ieën cômmissie en/of 'afdieëling', zedat hier 'n ôptimale situatie ôntstöt ten ànzien van besluutvörming.

Aoverzicht van ónze commissies:
1) Zittings cômmissie
2) Prinse cômmissie
3) Technische cômmissie
4) Jeugdcarnaval
5) Garde
6) Ôptocht cômmissie
7) Krante cômmissie
8) Boere commissie
9) Ald Prinsencômpeneej
10) Prinsenbal cômmissie
11) Schrieversgroep
12) Well licht

1) ZITTINGS CÔMMISSIE:
Doel:
't Samestelle van 'n gevarieërd programma, mit buuts, dans, zang en andere ôptreijes.
Plàtseleke, regionale en landeleke gebuurtenisse werre ôp ludieke wiéze àn de kaak gesteld.

2) PRINSE CÔMMISSIE:
Doel:
Dees cômmissie hèt tot doel, jaorleks enne neeje Prins te selectiere.
Verdere take:
Ienformiere en ienstru-iere van de neeje Prins, mit betrekking tot zien take ien dees funksie, tèves benadere van aspirant adjudante.

3) TECHNISCHE CÔMMISSIE:
Doel:
't levere van alle dienste en óndersteuning, welke gedurende de verschillende aktiviteite noeëdzakelek zien, resp. gevraogd werre.

4) JEUGDCARNAVAL:
Doel:
Ónder verantwoording van 't bestuur en leeje van c.v. "de Maasjoerts", ôp 'n 'zelfstandige wiéze' ienvulling gève àn alle aktiviteite gedurende 't carnavalseizoen vur de jeugdige Wellse carnavalsvierders.

5) GARDE:
Doel:
Dees geüniformierde groep dames, ónderdieël uutmakend van de geüniformierde leeje van de c.v., gèft ôp (ôn)officiële gelègenheeje, acte de presènce via show en dans.

6) ÔPTOCHT CÔMMISSIE:
Doel:
't organisiere van de carnavalsôptocht, waorbeej rèkening wördt gehalte mit 't ôp gepaste wiéze uuting gève àn 't carnavalsfieëst. Dees cômmissie fungiert as intermediair tusse ôptochtdieëlnemers, juryleeje, bestuur van de c.v., brandwèr,pliessie en 't publiek.
't Niveau van d'n ôptocht wördt bepàld dur de kwaliteit van de creaties van de dieëlnemers.

7) KRANTE CÔMMISSIE:
Doel:
'n Groep, bestònde uut kreatieve leeje, druugt zurreg vur de ienvulling, samestelling en distributie van de jaorlekse uutgave van de Wellse carnavalskrant: "de Maasjoerts". Redaktie krant

8) BOERE CÔMMISSIE:
Doel:
't Selectiere van 't 'boeregezelschap' en de hieële organisatie róndum de 'Boerebrulleft' behuurt tot eur taak.
Tèves de ientegrasie van dees activiteit binne 't carnavalsgebuure behuurt hiertoe, waorbeej àn de hand van acties getracht wördt 'n sluutende begroeëting nao te streve.

9) ALD PRINSENCÔMPENEEJ:
Doel:
Dees 'afdieëling' hèt as belangrieke funktie, 't ónderghalte van côntacte tusse de A.P.C. en de c.v.
Mit 'n eige bestuur en leeje, gevörmd dur alt-prinse, gèft de 'APC' acte de presènce beej zewel de resepsie van de neeje Prins en beej zien aftreije (ôpneme ien de 'APC')
Via 'n vergaderstructuur werre vurbereidinge getroffe, um ok beej andere carnavalsactiviteite eur óndersteuning te verlieëne, waorbeej hier mit name mot werre gedaocht àn 't organisiere van de 'Boerebrulleft' en de zittinge.
Tèves as óndersteuning beej diverse aktiviteite en 'deenktenk'.

10) PRINSEBAL CÔMMISSIE:
Doel:
Regele en ienvulling gève van de prinsebal, wat betreft 't thema, uutkômme, ànkleejing zaal enz.

11) SCHRIEVERSGROEP SINDS 1993:
Doel:
De schrieversgroep is d'r um mit name, mar nie exclusief, de live ôptreijes ôp de Maasjoerts zittinge te begeleije zewel qua ienhalt as vörm. Ok 't zuuke nor en stiemuliere van neej talent is 'n hoofdtaak. Verder is de schrieversgroep 'n vraogbaak vur iederieën die of dèn ôp de zittinge ôp wil treije.
De schrieversgroep keumt ien de lente vur 't urst beejèn mit 'n frequentie van èns per 4 tot 6 wèke. De schrieversgroep verzurgt ok de artiestenôpvang tijdens de zittinge.

12) WELL LICHT

Dizze jongste commissie van CV "De Maasjoerts" zurgt sinds 2003 vur 'n carnavalsôptocht ien 't donker. Dizze ôptocht start rond 19.00 uur. Ien dizze optocht zien de deelnemers, wages en creaties zelf verlicht. De rest is "zakkeduuster". De commissie Well-licht bestôt uut de vertegenwoordigers van de 6 werkgroepe, dit zien R.O.P., J.P.S., V.V.V., Fin, PR, en Deelnemers. Op d'n dag zelf zien rond de 70 vreijwilligers bezig um de 70 startnummers mit dik 1000 deelnemers ien de watte te legge zudat 11.000 toeschouwers zich köstelijk kunne vermake.